【原來佢都有份幫手!】承諾會一生一世保護⋯

    原來求婚嗰陣佢都有份幫手!

    62歲嘅無綫資深演員陳榮峻喺舊年無綫盤菜宴喺黃翠如嘅幫忙下公開,向拍拖3年嘅57年歲女友吳香倫跪地求婚,黃昏戀正式開花結果.之後陳榮峻話:「其實我好怕醜,又唔識講嘢。但係今日為咗我嘅至愛,我好希望佢能夠開心,同埋留下一個好好嘅回憶。」

    昨晚田蕊妮主持嘅《1+1的深情》,搵咗呢對準夫妻接受訪問,同場仲搵埋黃翠如、陳榮峻嘅兒子,仲有吳媽媽現身節目。

    喺2010年底,陳榮峻太太因腦部爆血管離世,當時陳榮峻話曾經有一段諗過自殺,阿田問到陳榮峻嘅兒子點睇爸爸呢段戀情,佢話:「當時覺得好突然,因為媽咪走咗唔係好耐,點解突然間會變心,不過諗深一層,都3幾年,最後都覺得爸爸要有個伴,妹妹開頭都唔係好接受,覺得對媽咪不忠,不過慢慢開解完,o依家都祝福爸爸!」

    之後阿田同陳榮峻吳香倫去咗食盤菜,陳榮峻嘅兒子亦都有現身,佢多謝Helen(吳香倫)陪爸爸行過呢段唔開心嘅日子,跟住阿田又讀出陳榮峻嘅女兒嘅一封信,同樣亦多謝Helen兼祝福佢哋,搞到陳榮峻吳香倫感到流淚,陳榮峻亦都話對婚禮好緊張,因為女友未結過婚,希望可以好似求婚一樣,俾一個美好回憶對方!

    不過陳榮峻話到o依家都未有同吳媽媽講結婚嘅事,於是乎阿田先搵咗吳媽媽拍咗條短片,再現身酒店,陳榮峻把握機會問準吳媽媽,仲承諾會一生一世保護香倫,吳媽媽當然唔捨得,不過都希望陳榮峻愛錫個女。

    最後佢哋去咗影婚紗相,陳榮峻同吳香倫大家都話要身體健康,要繼續走埋一段好長嘅路。

    (蘋果日報)

    SHARE