「Morning…坐月子，這一刀，知道媽媽的愛，是如此偉大。大叔日記」
呢位坐月大叔林利，即係前小虎隊成員、《學警狙擊》周海媚個社團大佬老公杜亦天——現年52歲嗰個林利。
點解坐月？如題，因為腸癌，發現時已是第二期末期，就快第三期。林利一直生活作息都正常，十點就瞓，清晨五點起身，又鍾意晨運，但癌魔還是找上門。但亦托賴因為林利個底打得好，所以手術後康復進展不錯，話咁快已經跑上台，為隊友胡渭康演唱會又唱又跳。
胡渭康當然知道林利出咗事，擔心到不得了，但林利一上台唱唱下歌已經唔記得痛。兩人合唱咗首《伴我啟航》，胡渭康笑老友：「佢真係好兄弟，今日病，割完包皮都撐我，你今日唔好咁用力。」
林利首次透露患癌一事。他稱這半年來不時發現大便帶血，最初自我安慰是痔患，後來見政府呼籲年過半百者最好接受腸道檢查，林利就去了，一驗之下發現是腸癌第二期尾。林利表示當時佢仲接咗個美國登台Job，所以登完台先至入院做手術，仲識講笑話自己好似孕婦生仔咁要剖腹。
因為腫瘤太大，超過11cm，做唔到微創。醫生手勢好，病人又聽話，手術順利。林利亦乖乖咁好似孕婦產子後在家中坐月——話就話係「坐月」，但林利上月29號做完手術出院，今個月2號就跑咗上台同胡渭康RE-U。睇番林利fb上嘅大叔日記（佢真係咁樣嗌自己），篇幅唔長，但有心思。入院當日一大早貼一張懸崖上的人嘅罐頭相，寫道：「Morning…07:00生命中很多事情不能做主的時候，也默默的挺過去，經歷了什麼都不重要了，反而如何堅強和樂觀的向前走著，進入時光隧道^^大叔日記」
出院後keep住寫報平安，得閒坐下巴士、同媽媽行街市，話：「正面態度，抵抗身上惡毒，第八天出關了，感謝密友們和家人支持，放在心底深處….出院第一件事要做的，與媽巡視業務，另外2月2號胡渭康演唱會見^^大叔感恩」
林利：「癌症並不可怕，態度決定一切」。祝大家身體健康！
(Apple Daily)
