前歌手陳文媛（BoBo）消聲匿跡娛樂圈多年，曾經喺情路上跌跌碰碰嘅佢終於遇到真愛，前年閃婚嫁給拍拖1年嘅教友老公，兩人組織幸福小家庭。
現年39歲嘅BoBo已經唔係藝人，而且好多年冇公開露面，但日前孖老公現身沙田時，被讀者蘇小姐認出透過「爆相爆片」分享近況，相片中嘅BoBo望着老公笑得甜絲絲，同行還有位約1歲多嘅小妹妹，溫馨滿瀉。
蘇小姐接受《蘋果》電話訪問表示：「嗰日大約下晝4點，喺彭福公園見到BoBo同幾個人野餐，其中有個小妹妹，仲有一隻狗仔，佢哋特登揀咗公園嘅盡頭位置，帶咗野餐蓆鋪喺度，又帶咗啲食物，所以走嘅時候都一袋二袋。」
從相片所見，素顏嘅BoBo皮膚白淨，用手遮着額頭擋太陽，全程甜絲絲望着身邊嘅老公，兩人邊行邊傾好恩愛，着黑白tee嘅BoBo老公孭住大背囊，兩手還各拿一袋東西，明顯甘願為家人及友人服務做阿四。同行嘅小妹妹年約1歲多，有個肚腩仔好可愛，眼仔細細嘴仔細細超得意，驟眼睇同BoBo老公有啲似樣，小妹妹年紀少少但好精靈乖巧，冇扭大人抱抱或拖住手仔行路，蹦蹦跳跳跟住BoBo身邊。蘇小姐表示：「小妹妹好黐BoBo，野餐時一班人圍圈坐，小妹妹坐喺BoBo隔鄰，佢哋表現得好親密，BoBo不停遞果汁同嘢食畀小妹妹，又陪佢傾吓偈玩吓手仔。」
蘇小姐仲話佢哋企起身走嘅時候，見到BoBo下身走樣，pat pat個躉好大，大腿都好粗，所以影咗兩張BoBo嘅背脊相。據知，大前年BoBo同舊愛金紫耀分手後，跟朋友重返教會尋求寄託，認識咗有共同信仰嘅老公，前年兩人蜜遊韓國買寵物用品時被爆戀情，而一向愛狗嘅BoBo，相信帶埋去彭福公園玩嘅poodle，就係BoBo夫婦所養嘅愛犬，同行小妹妹不時追住poodle嬉戲，玩得好開心。
(蘋果日報)
