【原來蜜蜜去…】阿Sa都有啲恨

    阿Sa一向處理感情事比較低調,之不過遇上「Mr Right」石恆聰(Anthony)似乎感情幾穩定,更愛得大方,唔介意公開戀情,亦會出席石家聚會,今日有周刊指阿Sa新年請假陪男友去布吉,難怪阿Sa日前忽然晒身穿露背泳衣,坐喺沙灘望夕陽嘅相,原來呢張相係男友操刀。

    據周刊指阿Sa同男友Anthony喺登機前,一直扮唔識,企開一、兩個身位,阿Sa提高警覺,不時望有冇人影佢,玩咗四日三夜先返港,同樣係前後腳分開出閘,之後又再開工拍《PTU機動部隊》,今日難得放假,阿Sa喺IG貼出selfie相,留言:「趁今日唔洗開工又咁好天,去做吓運動先。」

    阿Sa同Anthony細妹石佩藍一早認識,佢哋共同朋友係馬天佑,據阿Sa身邊朋友向報道指,阿Sa本來唔心急嫁,但係未知係唔係受好姊妹阿嬌影響,阿Sa都有啲恨,目前係等男友幾時俾驚喜,為咗多啲時間見,阿Sa先後同男友去東京、印度同布吉,阿Sa最近拍緊《PTU機動部隊》,本來佢想同劇組拎兩個禮拜假期去歐遊,唔知係唔係劇組放唔到人,佢先去布吉玩。

    (蘋果日報)

    SHARE