【大小姐有嘢講】宣佈即將離開《愛回家》:唔好罷睇呀!

    每晚嘅《愛.回家》深得民心,好多角色大家都好鍾意!而家又有人離開?

    歐瑞偉喺2012年加入處境劇集《愛.回家》,嗰陣飾演賤精律師KC,成日喺寫字樓做埋好多小動作,已經令唔少人對佢又愛又恨,不過佢對住飾演膽小怕事嘅下屬Terry(李偉健)又好照顧,嗰種合拍程度,產生咗唔少疑幻疑真嘅HeHe火花!跟住呢對活寶貝再喺《愛·回家之八時入席》和《愛·回家之開心速遞》繼續合作,前年仲獲得提名《2016年萬千星輝頒獎典禮》嘅「最受歡迎劇集搭檔」!

    噚日突然喺「H-E-J-N-O-M<=>芒姐再現」嘅fb專頁裡面,上載咗一條短片兼突然宣佈一件好令人震驚嘅消息:「KC宣佈即將離開 #愛回家 劇組…咁…TERRY點算?」

     

    短片係歐瑞偉出席一個活動,佢喺台上表示將會離開劇組:「我係會離開劇組,我係會喺呢個月底有三集都係講我,係一個幾特別嘅經歷,好開心,但係都好傷感,不過傷感得嚟,又好好笑喎,真係好多謝劇組,可以令到呢套劇咁多人鍾意!」結果唔少網民留言問點解,甚至話要擺睇添。

    事後有傳媒向歐瑞偉了解,佢話今次係一個美麗嘅誤會:「我只係到大陸拍《包青天》嘅外景,大約會拍個多月,拍完之後就會投入番《愛.回家》嘅劇組。」講到有網民話要罷睇,歐瑞偉就話:「吓,唔使咁嚴重,千祈唔好罷睇呀,其他每一條線、都發展得好精采!」唔知嗰幾集戲,係講同姚瑩瑩,抑或係同Terry嘅戲,歐瑞偉就笑笑口話:「呢樣真係要賣個關子,大家到時睇咪知。」

    大小姐林淑敏亦話:「舅父只係去拍戲啫,之後都會返番嚟,不過觀眾真係好,呢啲係愛呀!」噚日林淑敏亦都喺fb貼咗幾張相,睇見著住婚紗同送水輝影相,莫非呢段感情終於有結果?

     

     

    (fb / Apple Daily)

    SHARE