馬國明同黃心穎呢對戀人越愛越高調，經常俾人影到佢哋拍拖行街街，早前孖住去樂易玲屋企團拜，影大合照時，更大方坐埋一齊，目前佢哋忙住為新劇開工，不過總係會爭取時間見面，話明係熱戀，真係見少一陣都唔得。
今日周刊報道，馬明同心穎日前又俾人影到去又一城睇戲，話晒之前都被人撞破過好多次，所以佢哋都冇刻意避忌，馬明亦好有風度，冇撇低心穎BB，二人笑笑口面對傳媒，之後仲發現馬明架車嘅後座位置，擺咗一隻老虎同一隻豬嘅公仔，懷疑係兩個人之間嘅暗號，估唔到馬明都有鬼馬嘅一面。
報道又指問過心穎爸爸對呢位「準女婿」馬明嘅評價，黃爸直言唔會理個女同邊個拍拖，只要到結婚嗰日通知佢哋就得，黃爸仲爆好快會辦喜事，但係唔講係邊一個。據知就嚟結婚嗰個並唔係心穎BB，而係做空姐嘅三女黃心慧。
(蘋果日報)
