頭先講完古天樂，依家講下澳門古天樂（佢自認）——洗米華（周焯華）。
古天樂多年來keep住同緋聞絕緣，澳門古天樂就相反。包括去年6月被影到喺夏威夷醉攬「㗎妹」松岡李那，令女方一夜爆紅，成為話題女王。嗰一攬之後，兩人有冇斬纜呢？呢個問題，睇佢哋日前喺蕭定一公司周年晚宴嘅態度，應該估到一二。當晚洗米華同松岡再次相遇，洗米華同蕭定一坐主家家席，松岡就同張建聲等演員坐另一張枱。開席冇耐洗米華已經走咗去松岡嗰枱。
今日有周刊就話，洗米華過枱係因為想同其他人social，過到埋嚟「咦原來Linah你喺度呀？」好開心坐埋去。兩人雞啄唔斷，張建聲見狀都識做坐開，最後讓埋個位俾洗米華坐。咁之後洗米華就同松岡一齊坐，又向同枱嘅傳媒朋友介紹松岡﹕「呢位係我緋聞女友。」唔止咁，當晚兩人「雞啄唔斷」嘅程度，可以用四個字形容：旁若無人。因為現場好嘈，所以兩人不時耳語，互有攻守，有來有往。而聲稱同洗米華相識7年嘅松岡，自從同洗米華同場相認之後，一直寸步不離。
洗米華滿場飛，松岡都把握到最好機會，一個華麗轉身，又轉番去洗米華身邊，對眼係咁放電。最吊詭嘅係，其實兩人都知現場幾百對眼望實佢哋，不過一於懶理。洗米華仲同友人介紹，講番當日派對上攬松岡單嘢，佢話攬嗰個火辣body，唔係松岡嚟0架，係松岡阿媽嚟0架，「搞錯晒，我攬佢個媽！就以為我攬住佢！」
蝦。
(蘋果日報)
