28歲嘅陳嘉寶(Anjaylia)喺去年11月與拍拖4年嘅半億初戀男友黃頌祈(Epaphras)拉埋天窗。
新婚夫妻幾時都咁甜甜蜜蜜，但有時耍下花槍亦係一種情趣。有讀者日前透過傳媒，話日前晚上十點半左右，喺維園遇見Anjay同埋老公黃頌祈，佢哋起初都好恩愛，着住短裙仔嘅Anjay拖住老公隻手一齊由銅鑼灣慢步去天后，沿路都有講有笑。
原本好甜蜜手拖手….
但行到去網球場近廁所位置，Anjay突然甩開老公隻手，一副嬲樣自己行先。讀者潘先生話﹕「可能唔知講乜激嬲咗老婆啦，見Anjay行咗一陣就停低蹺住手，之後佢老公就示意行另一邊方向先啱，然後行埋去拖番住老婆。Anjay都郁一郁手想揈開，但佢老公都捉到好實，之後佢哋就一齊行咗去天后嗰度食嘢。」
Anjay日前回覆傳媒時否認同老公鬧交，佢話﹕「哈哈，冇嘢呀，我哋喺度玩！我好無聊，成日要佢陪我做戲，有時扮唔識，有時扮偶遇，有時扮嬲之類，我哋日日出街搭都會扮鄰居或者速遞員傾閒偈。因為以前上戲劇班有呢個環節，依家冇上堂咪叫佢陪我玩囉。」Anjay話自己向來貪玩，好友賴蔚玲同Evelyn都有玩過，佢話﹕「屋企人同朋友都覺得我有精神分裂。」
新婚人妻陳嘉寶今年都有派利是俾鄭嘉穎。(ig圖片)
（Apple Daily）
