《美女廚房》10周年有意再開拍《美女廚房》，製造新一班地獄廚神。咁主持人呢？有傳新一輯節目，唔會再由以往鐵腳方力申、鄭中基、梁漢文等人主持，而係換上「老是常出現」嘅Bob林盛斌、蕭正楠同張振朗。
有媒體前日出咗個post，重溫一下舊節目，又有大大個Bob喺正張相中間，問fans會唔會睇。有人留言話舊主持先係精髓，換晒成個節目冇靈魂，亦都有人話，睇新主持嘅相，已經覺得嘈，而且不少留言都將矛頭直指Bob：
「唔洗睇啦，尤其是最煩X嗰個光頭佬」；
「阿Bob同蕭正楠太趕客」；
「聽到有阿Bob都唔想睇，嘈到」；
「人哋未講完佢搭咀嘈住晒」；
「你出嚟都冇用，我哋罷睇」；
網絡世界傳得好快，阿Bob見到有人講佢，都有出現喺個post到留言洗版式回覆，tag番大部份支持佢嘅人逐個多謝，對於留言鬧佢煩嘅人，都落足心機搭嗲講兩句，話會好好反省。
驟眼睇，仲以為呢個係Bob facebook，反而網主喺主場就一粒聲都冇出，唔知貴人事忙唔得閒覆，定係見到留言太頭痛唔想覆，至於一班支持Bob者，就讚佢好好EQ，俾人鬧都咁好脾氣。
Bob喺網主 facebook留言覆網民，本來夠晒公關，豈料惹來反感。Bob噚日回覆傳媒時話：「哈哈，同大家互動一下，傾吓偈啫！」佢好阿Q精神附送三個笑臉公仔。Bob否認「踩場」，佢話：「冇踩埸啦，其實我好客氣同網友傾偈，有唔少網友話我好勤力同真心回覆。」
阿Bob再有感而發，以長文回覆傳媒：
「其實我好多謝KXXX JXX嘅關注，我一直都係佢嘅fans，我亦好尊重每一個網友。係咪真係有新一輯同係咪真係我做主持，留番日後公佈，如果落實，對我嚟講係一個工作上好重要嘅里程，因為可以喺一廠主持一個系列嘅綜藝節目係我做主持人嘅夢想，但係另一方面亦係一個好大嘅挑戰，因為上一輯嘅主持做得好好，亦係好多觀眾心目中嘅經典同集體回憶，所以我完全明白同尊重消息傳出之後大家嘅反應同意見，各位網友們嘅留言，無論正面定負面，對我嚟講都係好重要嘅推動力，令我明白自己不足嘅地方，好好檢視自己點樣可以再做好啲，進步同改善。
例如之前有網友話過我做主持講嘢好大聲、好嘈、好浮誇，其實最近我主持《大玩特玩》真係有去好好控制自己聲量，亦嘗試唔好吓吓都咁誇張、咁癲，我發覺出嚟效果真係好好，身邊好多朋友都話睇得好開心，所以好多網友們嘅意見邵都係好有建設性，我真係好希望一步一步去努力改進，令觀眾同網友們對我改觀！
我好感恩見到部份網友對我表示支持同鼓勵，叫我俾心機做好佢，我亦好開心見到有網友本身話罷睇，之後互動完，了解我多啲之後話俾面睇十分鐘，哈哈，真心好多謝佢哋。
我喺主持方面嘅年資同經驗上都係好幼嫩，我真係好感謝佢哋嘅意見，所以我先逐一留言同佢哋傾吓偈，了解多啲自己嘅缺點，希望彌補不足之處。
不過有部份網友話我又肥又樣衰又肉酸就真係冇辦法，因為天生係咁，哈哈哈哈！我再重申，確實消息交番俾公司交待，不過如果係真，我相信台前幕後所有工作人員包括我自己都會好努力去做好呢份工作。」
（facebook / Apple Daily）
