【汪明荃都擔心】羅家英:我做完手術到阿姐做

    羅家英又指阿姐都擔心,所以唔准佢揸車:「我做完阿姐會跟住做,我試咗先,做先行步隊。」羅家英直言如果阿姐稍後做呢個手術,會照顧阿姐:「喺養和做手術。」

    羅家英今日戴住幅黑超到達影視博覽一個活動,佢原來日前接受白內障手術,避免強光要戴超防強光,佢笑言:「唔係扮有型。」羅家英指自己多嘢,今日係完成手術後第3日,佢透露阿姐汪明荃稍後可能都做項手術:「做咗兩隻眼,呢隻眼睇遠嘢,嗰隻眼睇近,『鴛鴦眼』,以後睇嚟就會清楚,我做完阿姐會跟住做,我試咗先,做先行步隊。」

    羅家英又指阿姐都擔心,所以唔准佢揸車,暫時要兩個禮拜後才可以除黑超,因預咗日期做手術,工作未受影響,今個月23號會去合肥做商演,之後25號去橫店拍嘢,要30號回港。羅家英直言如果阿姐稍後做呢個手術,會照顧阿姐:「呢排佢忙,佢要驗咗眼先再定日子,喺養和做手術。」

    問到呢段時間阿姐有冇煲啲補眼湯水?羅家英諗咗一諗:「補眼最多都係滴眼藥水,好難補,補眼就要補肝腎,唔補腎,隻眼唔夠力。」另外,羅家英七月有份演出《再見螢火蟲》真人版,佢話:「我唔係好熟呢套戲,不過知呢套係悲情戲,一見惠英紅,佢話拍呢套戲,小紅即話好慘,睇完會喊,係唔係講打仗,諗住之後睇下。」

    至於做乜角色,羅家英笑言阿姐唔俾有爭女戲份:「演阿爺、老竇、阿公嗰啲角色,唔通同人爭女咩,唔會喎,佢想睇下我魅力去到邊。」羅家英同阿姐下個月一齊上船唱歌,阿姐之後亦會同中樂團開演唱會,不過羅家英講明唔會上台客串,阿姐會唱方逸華啲歌。

    (蘋果日報)

    SHARE