藝人杜汶澤向來敢言，今日他於社交網留言透露接受專訪時遇上不禮貌對待，自覺「無謂受氣」的他最終除下咪高峰離開，雙方不歡而散，阿澤直言：「你鍾意點剪就點剪啦！我條命硬過鐵，你剪我唔死㗎！」
事緣近日忙於籌備自己網上節目的阿澤，由昔日亞視好兄弟穿針引線接受網站記者錄影訪問，期間語氣及溝通出現問題，令阿澤忍無可忍，開始未夠二十分鐘即主動中斷訪問，事後更於社交網「洩憤」留言：「我老喇，唔會俾（畀）自己再受呢啲閒氣…我肯俾（畀）你訪問，你又句句窒頭窒勢，語氣又差…過程中我已經盡量認讓…你咁嘴gel gel做乜啫？有乜好處吖？」
阿澤接受東網訪問，他表示心情已平復：「個女記者嚟到好似搵交嗌咁，態度同訓導主任教訓學生，又或者警察同人落口供冇乜分別。上次（指電台訪問鬧不快）我都未至於咁，今次真係我入行25年嚟第一次掟咪走人呀！」阿澤再打趣謂：「以前我唔明有啲公園阿伯點解唔同陌生人傾偈，依家我就係公園阿伯嘞，應該考慮唔再同唔識嘅人做訪問，識得耐嘅（記者）大家明嘅。」
佢話都係25年嚟第一次～（資料圖片）
杜汶澤fb
(東方日報)
