陳冠希（Edison）日前喺上海參加NIKE快閃店活動，突然被公安粗暴推走，搞到Live被迫腰斬，唔少粉絲都好擔心，幸好Edison最後冇事報平安。
Edison嘅家姐陳見飛今日仲喺ig報告咗Edison最新行蹤，原來佢已經返咗美國屋企喇。依家嘅Edison已經變咗深閨男人，因為有中國超模女友秦舒培為佢生咗個寶貝女Alaia，囡囡剛滿1歲，最近學識行路。
Edison無時無刻都陪住愛女，見Alaia一邊聽住強勁音樂，一邊學行，雖然震吓震吓，仲唔小心跌低咗，但Edison就好有耐性，一步步退行讓愛女行多幾步。
佢好興奮咁「Wow」咗幾聲，然後話﹕「Say hi everybody,I can walk,I can dance.」囡囡亦好醒目咁手舞足蹈。現在Edison大部份時間留喺美國居住，有工作先會中港台四圍飛。
咁外國間屋當然係好大好大啦，同好靚好靚啦，其中一個角落全部都係村上隆嘅flower ball咕臣，仲有隻巨型龍貓，咁就唔怕小朋友撞傷，真係細心。
(蘋果日報)
