【傳大台因為千嬅換走鄧萃雯】丁子高就回應話⋯

有金牌編劇之稱嘅陳寶華,最近回巢返咗無綫拍《多功能老婆》,仲搵咗10幾年冇拍劇嘅楊千嬅做女一,早前佢哋仲搞咗個記者會宣佈呢件事,千嬅話今次係好有緣份同奇妙嘅事,佢話:「對上一次拍劇已經係2001年同林峯拍《美味情緣》,舊年12月中我開演唱會嗰陣,余詠珊搵丁生(老公丁子高),話陳寶華想搵我拍劇,仲話覺得呢個角色好似我!」

不過有周刊報道,查實呢套劇嘅女主角最初屬意係鄧萃雯,而雯女講過話等緊寶華姐嘅劇本,佢預留檔期演出,點知去到開記者會嗰日,先知道個角色唔係自己,空歡喜一場。報道仲話丁子高喺舊年決定成立經理人公司,一方面希望千嬅更加「入屋」,另一方面新公司又會搵新人,於是好積極同TVB傾合作,希望大家可以保持良好關係,報道又爆寶華姐都覺得同千嬅合作有新鮮感,喺收視有一定嘅保證,最後雯女錯失咗合作機會。

事後雯女接受周刊訪問話一直好想用廣東話對白,而且亦有同TVB傾緊,等緊啱嘅劇本同夾得到個期,佢又話可能之前去台慶頒獎禮,啲人覺得佢會返嚟拍劇,所以佢咪順應大家去講。

丁子高今日接受《蘋果》訪問話:「呢個真係一個非常莫名奇妙嘅報道,成件事係喺舊年12月,Sandy聯絡我,話寶華姐有一套劇要開,所以我哋咪一齊出嚟食個飯,第一次見面已經傾得好愉快,大家好有興趣,之後我哋咪一直傾落去,TVB俾嘅條件好好,好有誠意,所以最後決定試吓做,相信今次千嬅係一個幾突破嘅嘗試,佢都好耐冇拍劇,咁啱呢套劇嘅英文名叫做《Wonder Woman》,同千嬅演唱會想講嘅message一樣。」

丁子高解釋呢個故事出咗嚟,大家都覺得呢個角色似千嬅:「我都識得鄧萃雯,雖然唔係關我哋嘅事,但係都覺得有啲唔好意思,好似無端端有呢啲花邊新聞,好古怪。」

(蘋果日報)