【臉真醜…】被批整容過度:唔想再活下去

    去年與結婚10年嘅老公離婚後,頻頻喺Instagram晒新相,卻惹來網民惡評,指佢整容過度、張張相都唔同樣。雖然曾演出港產片《桃色》嘅43歲韓國變性藝人河莉秀早前宣佈會起訴留惡評嘅網民,但未知係咪心理壓力太大,河莉秀噚晚喺Ig上載黑白相並稱唔想再活落去,令其他網民表示擔心。

    河莉秀發文寫道:「喺世上活着,真係…因為我,所愛嘅人而聽到唔好嘅說話,因為愛我而被人指指點點、所有事都亂晒籠,我能為我所愛嘅人做咩呢?我嘅存在本身可能就係錯,閉上眼希望唔好再醒來。我自己感受到嘅污衊感及悲傷,直到依家仍好努力地生活、善良地生活,睇嚟呢個世界係唔可以靠努力同善良生活,一係到此為止喇…一係休息喇。」但文中「休息」一詞疑意有所指。

    河莉秀去年與老公鄭英振離婚,結束10年婚姻

    而另一張貼文中,河莉秀似乎想刪除晒手機上所有內容,同樣寫道:「喊得太多,睇唔清前面,鼻又塞埋,無法好好呼吸,又出唔到聲。臉真醜…睇起嚟好傷心…唔想再咁生活。」意味深長嘅發文令粉絲及其他網民擔心佢會做傻事,立即留言為佢打氣:「唔好受惡評影響,要變得堅強」、「短時間唔好再睇留言,控制好情緒」等。

    河莉秀頻頻更新Ig,有網民留惡評指佢整容過度

    (Apple Daily)

    SHARE