除咗Elanne同Oscar喺12月23號結婚，原來同場仲有另一對準新人！佢哋話明年六月就會結婚啦，仲透露埋Janice Man係伴娘～恭喜恭喜！問到怕唔怕婚禮畀JM搶鏡？準新娘就話：「唔怕，我哋唔計呢啲嘢。」真係好好姊妹！
江若琳(Elanne)同未婚夫蕭潤邦（Oscar）、仁濟前主席嚴玉麟囡囡嚴紀雯(Carmen)同未婚夫Jeffrey、陳浚霆(Andrew)、馬天佑同朱晨麗等，昨晚喺灣仔出席仁濟醫院第51屆董事局就職聯歡晚宴。
Carmen接捧擔任仁濟總理，加上籌備明年6月嘅婚禮，佢笑言忙上加忙，仲話會諗定兩個好特別嘅角色畀老友馬天佑同Andrew，Andrew即自薦做司機同司儀，而馬天佑就包辦形象同揀婚紗，Carmen話：「8月會去意大利影婚紗相，婚後一定會繼續做嘢。」
而Carmen仲透露Janice Man係伴娘，仲話希望JM都快啲嫁，到時會親手遞上花球，問到怕唔怕婚禮畀JM搶鏡？Carmen話：「唔怕，我哋唔計呢啲嘢。」Andrew仲提議姊妹全部素顏，而馬天佑就話：「靚唔過Carmen嘅，自從佢訂婚後就發出一種光芒。」
而Oscar同Elanne繼續大晒恩愛，佢哋透露12月23號嘅婚禮場地已經定咗喺紅磡嘉里酒店，仲話會擺40圍，o依家忙緊齊集兄弟姊妹，Elanne笑話：「因為男方兄弟好盛大，搞到女方有壓力，因為雙方要一樣數，佢有10幾廿個兄弟，我暫時有10個姊妹，可能搵啲男仔朋友做姊妹。好開心好多朋友見義勇為幫我哋，暫時都未有壓力。」
佢哋仲話冇因為籌備婚禮而嗌交，Oscar就話方向唔啱時就會選擇唔出聲，但身邊嘅Elanne就爆料話：「佢會用3個鐘頭講道理。」Oscar就解釋話婚後嘅日子對佢嚟講係更加重要，但一切都會以未來太太嘅喜好作準。而提到結婚當日會唔會考慮復出？Oscar笑話：「我想大家開心咁走，唔想大家咁辛苦。」
另外，朱晨麗以表演嘉賓身份現身，佢話會唱兩首歌，仲笑言自己未入行前嘅夢想係做歌手，唱卡拉OK一定會霸住支咪做咪霸。提到嚟緊開拍新劇會同偶像楊千嬅合作，朱朱就話好開心同期待，平時都鍾意睇千嬅嘅喜劇減壓，問佢怕唔怕千嬅拍攝時忍唔到笑狂NG？朱朱話：「會㗎咩？如果開心忍唔住笑，可以當係花絮，最緊要過程和諧開心。」
(蘋果日報)
