恭喜，恭喜！求婚成功後一直都好低調，所以邀請親友名單只宴請至親同部份圈中好友，以娘家為主，近日終於向好友派帖，原來星期六就結婚啦！佢哋近日忙於籌備工作，為婚禮倒數做好準備，喜帖設計簡約，有中英文版，喜帖顯示男友。。。
現年34歲嘅07年亞姐冠軍張珮汶（前名張家瑩，Grace），去年跟圈外男友A先生低調拍拖，同年10月孖咇到峇里出席友人婚禮，兩人被喜慶氣氛感染，A先生求婚，Grace即答應。據知一對新人揀定本周六於尖沙嘴洲際酒店擺喜酒，由於男方唔係圈中人，一切想低調，所以Grace邀請親友名單，只宴請至親同部份圈中好友，當然以娘家亞視之友為主，佢哋近日忙於籌備工作，為婚禮倒數做好準備。
Grace去年10月喺facebook貼圖宣佈喜訊，佢貼出英文愛的宣言，當中內文係求婚表白，Grace仲留言：「Today, facing the Indian Ocean, I said, Yes I would!（今日，面對印度洋，我說，我願意。」Grace喺峇里享旅程，除換上火辣三點式享受陽光與海灘，當然少不了同A先生預支蜜月。Grace宣佈封盤，好友都送上祝福。
近日一對新人向好友派帖，喜帖設計簡約，有中英文版，喜帖顯示男友英文名叫Adrian，中文名叫何駿杰，當日婚禮，賓客dress code係「Black Tie Optional」，即男士們可以隨意選擇穿着「踢死兔」或深色西裝配領呔，而女士則可以揀選着晚裝或者cocktail dress，當然以高貴得體為主。
即將升呢何太嘅Grace，平日熱愛喺社交網分享近況，未知可是忙於搞婚禮細節，佢share明顯少咗。準新娘Grace婚前去咗中環海濱舉行嘅香港首個成人嘉年華18+Central，去玩嘅女士可以近距離接觸爆肌猛男，Grace婚前大解禁，撇甩未婚夫跟6女同行，一行7女去「狂歡」，Grace仲喺Instagram貼出同兩名精壯猛男嘅合照，Grace留言：「definitely had a fun night tonight girls! Can’t believe it’s only a week away, thx so much for this wonderful experience.」言語間透露嗰晚玩得好開心。
Grace被爆近日忙籌備婚禮，佢今晚回覆《蘋果》時話：「 唔好意思呀，呢排在籌備婚禮的東西比較忙，所以沒有回覆，剛剛才回家，累了。婚禮的事情暫時不發表了，因為雙方家長都希望低調，希望你諒解啦。」
(蘋果日報)
