【六月就生得】好唔開心:人人都話我個肚細,冇人理解我努力

陀B已經7個月嘅佢腳踩兩吋高踭鞋現身,佢話只係今日工作可以着高踭鞋,見佢肚凸凸但手腳纖瘦,佢就話預產期係6月中至尾,將會剖腹生:「可能個人高,着鬆身少少就睇唔到個肚,人人都話我個肚細我好唔開心,冇人理解我努力,聽到大家話我。。。」

蔣怡同張可頤今日在旺角現身美容科研技術活動宣傳,兩人為品牌擔任代言人,陀B已經7個月嘅蔣怡腳踩兩吋高踭鞋現身,佢話只係今日工作可以着高踭鞋,平時着會俾老公鬧。見佢肚凸凸但手腳纖瘦,蔣怡話:「上次懷孕時候自己同BB都偏瘦,今次正常好多,不過可能個人高,着鬆身少少就睇唔到個肚,人人都話我個肚細我好唔開心,冇人理解我努力,聽到大家話我今日個肚大好有成就感。」蔣怡努力增肥中,已經重了8公斤(約17.6磅)。

蔣怡話預產期係6月中至尾,將會剖腹生,蔣怡話囡囡好期待細佬出世,仲經常同細佬傾偈。至於改名方面仍然未有定論,不過蔣怡話老公好奇怪,畀好多名出嚟都好奇怪,仲話:「我哋啱啱去完泰國旅行,老公喺機場買咗一本印度文字典,佢想改個印度英文名,喺機上面一路讀我聽,我話好咖喱,聽到辣辣地感覺,又唔可以直接批評反對,要諗婉轉啲同佢講,老公話想個名有佛角度。」

而張可頤係為產品美容方面擔任代言人,佢覺得今時今日女性唔單只着重瘦,線條都好重要,就算做幾多運動都要塑形,覺得手臂、肚、屁股位置最講究,而且夏天將至,要定期保養,佢覺得o依家身形好fit。

(蘋果日報)