【爛咗】大會承諾換選美冠軍獎座:到o依家都未收番個獎座

    之前傳同湯洛雯撞樣嘅倪晨曦(Elva),一直喺網上拍唔少美妝片嘅,日前獲香港市務學會頒發「KOL Marketer of the Year in Beauty」獎項,以認同Elva喺Beauty界嘅表現。

    Elva得到呢個獎項,最想多謝係支持自己嘅人,佢話:「我好榮幸得到呢個獎項,呢個係我2018年第一個獎項,每個獎對我嚟講都係好大鼓勵,當然最重要係一班支持我嘅fans,平日大家會留言,畀好多意見我,我全部都睇到,令我不斷進步。」

    Elva得獎後,立刻拍片放上網親自多謝fans,而喺頒獎禮後,工作員已提醒過Elva記得帶走個獎,Elva笑話:「記得好多年前喺加拿大選美得冠軍,但偏偏獎座上面嘅水晶球爛咗,當時大會話可以換一個新嘅畀我,點知一換,到o依家都未收番個獎座,哈哈!所以以後我都會記得帶走個獎。」

    (蘋果日報)

    SHARE