【恭喜哂超蓮!】三太:始終係佢第一個細路

    超蓮話:「我每朝瞓醒都會同媽咪分享做過啲乜嘢。」身旁嘅何太就淡淡然話:「我唔緊張,佢緊張啲,始終係佢第一個細路,係緊張啲。」至於細仔猷啟就快結婚,問何太會唔會唔捨得?何太話:「細路大咗就會組織家庭,冇乜特別,唔會話唔捨得,我細仔好黐屋企,又多一個(女)返嚟。」

    賭王何鴻燊千金超蓮以百萬投資嘅台灣玖五牛肉麵店今日喺銅鑼灣開幕,三太何婉珍出席剪綵,見證超蓮嘅「BB」誕生,超蓮笑言噚晚緊張到瞓唔着,因為開店好有壓力,超蓮話:「第一次做飲食,每日都學習緊,希望可以做出好成績。我每朝瞓醒都會同媽咪分享做過啲乜嘢。」身旁嘅何太就淡淡然話:「我唔緊張,佢緊張啲,始終係佢第一個細路,係緊張啲。」

    問何太有乜嘢tips畀囡囡?何太話:「勤力囉!對佢有信心。」何太之前都有試食,有咩改善都會講,佢仲話:「自己識整嘢食,所以要求高啲,遲啲會加入自己嘅(餐單)。」超蓮就話:「我哋做咗個蕃茄湯底為香港舖而設嘅。」超蓮希望日日生意好,但冇設定幾時回本,問何太怕唔怕個女做飲食會辛苦?佢話:「唔怕,後生嘛,瞓一覺全部返嚟。」問何太想唔想囡囡做飲食界女強人?何太話:「等佢哋決定,喺邊度發展都冇要求,最緊要佢哋開心鍾意。」

    至於細仔猷啟就快結婚,問何太會唔會唔捨得?何太話:「細路大咗就會組織家庭,冇乜特別,唔會話唔捨得,我細仔好黐屋企,又多一個(女)返嚟。」問到畀未來新抱幾多分?何太就話:「幾多分唔敢講,未好深入了解,要過一段時間先。」覺得猷啟太快結婚嗎?何太話:「冇得講快唔快,佢覺得啱就啱,佢哋有佢哋諗法,要我幫手籌備婚禮我一定會幫,都開心嘅。」超蓮撒嬌話話題轉咗去細佬度,佢笑話:「今日我開舖呀!」


    另,曾傳出追求超蓮嘅霍啟山,原來今日到有去賀超蓮嘅牛肉麵開張,公開鄭紹康就喺佢微博貼咗霍啟山嘅相。超蓮事後透過電話回應:「我點知佢會嚟?我嘅邀請係公開㗎!好多親戚朋友都有嚟支持。」係咪公開戀情?佢話:「痴線,我o依家單身,亦唔談戀愛。」

    (蘋果日報)

    SHARE