【本身以為冇事】突然PO吊鹽水相:健康非必然

上周日喺IG透露旅行返港後,即感到身體不適,諗住食得清淡啲,過幾日就冇事,點知之前竟然入咗院,今日放咗一張喺醫院吊緊鹽水嘅相:「是次紀錄作時刻警醒,提醒自己要。。。」

無綫藝人劉佩玥(Moon)早前同好姊妹陳瀅去俄羅斯Murmansk,上周日喺IG透露旅行返港後,即感到身體不適,出現嘔吐及肚瀉,當時未知係腸胃炎定水土不服,佢認為可能之前喺摩爾曼嗰邊飲嘅水比較潔淨,所以返港後腸胃敏感,諗住食得清淡啲,過幾日就冇事,成個人亦都消瘦咗。

點知之前劉佩玥入咗院,今日先喺IG報平安,放咗一張喺醫院吊緊鹽水嘅相,話終於出院,感謝醫護人員及同事喺呢段時間嘅愛護同照顧,才可以喺病痛中放下戰戰兢兢嘅心,去安心接受治療,劉佩玥續道:「請大家放心我已經出院了,是次紀錄作時刻警醒,提醒自己要愛惜身體,小心飲食,勿過份勞累,勿輕視休息。健康非必然,好好珍惜神給我們的生命。感謝身邊的祝福和關心,你們的愛,就是最好的禮物。」

唔少網民回覆勸佢要多啲休息、小心身體、早日康復。未知緋聞男友周志文會唔會細心照顧佢呢!?

(蘋果日報)