噚晚台灣傳媒忽然爆出一個驚人消息……指吳奇隆同結婚3年、兼細佢16年嘅大陸女星劉詩詩三年婚姻玩完，標題仲話劉詩詩有婚外情，仲有埋BB……
唔是嘛？咁突然？早排兩個先至去洛杉磯過二人世界，點解無啦啦變三人世界？呢個驚傳離婚嘅風，其實係來自大陸。台灣傳媒引述大陸消息稱，劉詩詩出軌並懷孕，但BB爸爸唔係吳奇隆，標題仲寫著「卓偉爆料：劉詩詩承認婚內出軌，和吳奇隆已協議離婚！」卓偉，即係喺大陸有「第一狗仔」稱號那位。睇到呢度，證據呢？
大陸傳媒報道，一名知名博主向卓偉求證，卓偉就話係俾人借佢個名亂講，並無此事。吳奇隆身邊嘅工作人員都話，「兩人感情挺好的」。往常見親吳奇隆夫婦，大多數都係喺機場，而且畫面通常都係吳奇隆一人推住成車行李，氣質人妻劉詩詩就好整以暇，篤手機或者欣賞老公嘅強勁臂彎。
喺無啦啦爆出婚外情有埋BB咁嘔血嘅劇情之後，今日一大早，吳生吳太就現身上海機場，素顏嘅劉詩詩戴mask遮面，兩眼係咁游走喺老公身上，仲出手摸———手臂。吳奇隆呢？繼續做番佢一貫嘅角色——推行李。
兩公婆夾啱時間出埠兼用行動闢謠。
(蘋果日報)
