講到佢嘅感情生活，似乎略見平淡，有傳金剛曾經對佢獻殷勤，之後又有周刊影過佢同藝員訓練班嘅黃毅進撐枱腳兼返咗屋企，好似唔多聽到佢啲戀事！日前就捕獲到佢同曾經參加過「功夫之星」嘅。。。
話晒樣靚身材正，又點會冇人追呀？日前《蘋果》喺銅鑼灣見到無綫藝人陳婉衡（Alycia），同行嘅仲有曾經參加過「功夫之星」嘅羅浩銘，嗰陣大約係下晝4點鐘左右，見到佢哋行地產舖，主力睇吓啲租盤，睇咗一輪之後就入咗去舖頭搵咗個經紀睇樓，不過睇咗幾間都唔係好啱心水，擾攘大約半個鐘左右，同嗰個經紀分手之後，佢哋邊行邊傾咁行咗去坐車，之後上咗架小巴返咗去Alycia喺香港仔嘅屋企！
事後Alycia接受傳媒訪問，講到係咪同羅浩銘拍拖睇樓，佢笑住話：「係就係睇樓，不過唔係拍拖，我o依家住緊嗰度租約滿，要搵地方搬，所以我呢排搵咗啲朋友陪我睇樓，希望可以聽多啲唔同嘅意見。」佢又話：「o依家都有一、二個樓盤睇啱咗，希望可以盡快搞掂，喺下個月頭搬得到！」
至於同羅浩銘嘅關係，Alycia話：「我哋識咗好耐，一直都係朋友，唔係拍拖，我o依家都冇拖拍，真係dry到爆拆！」
(蘋果日報)
