早前一炮而紅，可以話事業愛情兩得意，最近被爆29歲女星出雙入對，先後去日本、台灣、梵蒂岡，之不過蜜運得咁順利，未知係唔係怕影響事業，佢矢口否認拍拖，但前晚(18號)就被台灣媒體影到佢同陳冠希前女友喺party上。。。
26歲王大陸憑電影《我的少女時代》演「暖男」徐太宇走紅，後嚟轉戰大陸，演《鮫珠傳》、《英雄本色2018》等，王大陸可以話事業愛情兩得意，最近被爆同29歲韓國女星姜漢娜出雙入對，先後去日本、台灣、梵蒂岡，之不過蜜運得咁順利，未知係唔係怕影響事業，王大陸矢口否認拍拖。前晚(18號)仲被台灣媒體影到佢同陳冠希前女友洪文安喺party上眉來眼去，又圍埋一齊吸煙「打邊爐」吞雲吐霧，傾得不知幾開心。
王大陸前晚以來賓身份去華山藝文特區出席TAST華山快閃店活動，一去到即被一堆名媛關注，又興奮拍佢背脊，王大陸同場內嘅人閒聊咗一陣，趁有空同友人行去暗處抽煙，其中一位「煙友」就係陳冠希前女友洪文安，之後王大陸返會場，又同洪文安玩，逗留個幾鐘，王大陸欲離去，又繼續撩洪文安，洪文安陪王大陸行到停車場，王大陸獨自揸林寶堅尼迅速返屋企。唔通真係有機會發展一下!?事後王大陸經理人回應台灣傳媒表示：「他們就是好朋友，也是好鄰居。」
經理人指王大陸近排留喺台灣上表演課及武術課，所以先間唔中同朋友聚會；據報道指當晚駐場DJ就係洪文安現任男友Mai，洪文安近期同朋友經營服飾品牌Mejuly兼任模特兒。
王大陸去年拍《鬼吹燈之牧野詭事》，認識緋聞女友姜漢娜，其後二人同遊大阪環球影城，之前又有網民影到佢哋喺台北上引水產買海鮮，日前又有網民捕獲佢哋喺梵蒂岡甜蜜玩自拍；王大陸經理人僅係稱一班人去歐洲參加錶展，工作之餘「就是朋友一起玩，沒甚麼啦」。
(蘋果日報)
