【桃花運爆燈!】三個女友都唔夠 鄧兆尊又有新寵

鄧兆尊一直好有桃花運,除咗有大婆Carmen喺埋一齊20幾年外,同二奶車厘子(Cherry)都有10幾年,新收嘅揼骨妹三奶Claire都行埋年幾。

日前見佢同車厘子逛銅鑼灣,身邊又多咗一個中女,而且呢位中女同車厘子好似幾好感情,兆尊行喺兩女前面食煙,兩女就喺後面跟住,一路講唔停。兆尊偶爾會回頭望下佢哋,咁車厘子就會好醒目咁行快幾步,同兆尊又傾下偈。

 

後來佢哋3個人行到利園商場附近,入咗一間大時裝店睇衫,兩女都係買底衫,所以不停喺女裝部試衫,兆尊就冇入去,只係企埋一邊用手機嚟打機,最後兩女各自買咗一件底衫就離開。之後佢哋行咗去時代廣場16樓,去到一個波鞋特賣場睇波鞋,最初都係兩女喺度試鞋,後來車厘子都叫兆尊試鞋,結果佢哋3個人離開時,合共買咗5對鞋,全部由兆尊埋單。

中女同車厘子好似幾好感情

 

《蘋果》打過俾兆尊,問佢係咪有新寵四奶?佢話:「梗係冇啦!嗰個係車厘子啲好姊妹,車厘子約咗我,佢叫埋個姊妹一齊出嚟,就係咁簡單。」

 

 

 

(Apple Daily)