【約完契哥馬浚偉】大肚鍾嘉欣原來同佢都咁好感情~

    陀B五個月嘅鍾嘉欣,近日返港逗留兩個星期,今次冇帶大女Kelly返嚟,自然多咗時間約舊同事見面,目前粗身大細,佢都盡量唔化妝,以素顏見朋友。

    嘉欣返嚟都真係幾忙!噚晚先約完契哥馬浚偉見面,佢哋拍《皆大歡喜》認識,之後拍《金石良緣》、《老友狗狗》及《蒲松齡》等,二人以阿哥、阿妹相稱,噚晚馬浚偉喺微博寫道:「兄妹相聚,是快樂的!」

    其實馬浚偉喺圈中有幾個「花旦契妹」,包括楊怡、陳法拉及鍾嘉欣,三個女仔都係老友,唔知幾時四個人一齊聚埋呢!?

    馬海倫剛才喺微博po出合照:「今天中午同嘉欣午餐,《金石良緣》後就冇再合作,她剛剛在香港大家可以聚舊。」

    佢哋2007年合作拍《金石良緣》,馬海倫演嘉欣繼母「楊大芬」;相中見着白色鬆身衫、戴黑框眼鏡嘅嘉欣,腹部微隆,精神唔錯,不過黑眼圈比較大。

    (蘋果日報)

    SHARE