藝人陳茵媺（Aimee）為德國幼兒食品品牌拍攝全新一輯廣告，身為代言人的Aimee拍攝期間以一襲牛仔造型上陣，跟多名小演員於郊外田園拍攝。雖然不少藝人都表示怕跟小朋友合作，但自言童心未泯的Aimee就表示未有被小朋友考起，她坦言最喜歡跟小朋友及動物合作：「今日覺得好好玩，感覺唔似做緊嘢，好似同一大班小朋友玩咁！」
唔同仔女合作
被問到會否希望跟自己的子女合作時，Aimee即耍手擰頭謂：「我會集中唔到呀！」Aimee透露過往曾有廣告商邀請她與仔女一同拍廣告，但卻被她一一推掉，她指：「佢哋年紀仲細，一來唔想佢哋太多曝光，二來我覺得佢哋應該以讀書為先，先培養讀書心態，好似我以前咁，我都好鍾意拍嘢，但Daddy唔想我心散，要我大學畢業先，之後先可以選擇自己想做嘅嘢。」
暫時唔再生
Aimee與丈夫陳豪三年抱三，問會否再生小朋友？Aimee斬釘截鐵表示短期內未有這個打算，揚言暫時三個夠晒數：「湊三個小朋友好辛苦，因為我同阿Mo（陳豪）好多嘢都係親力親為，而且我想做番幕前工作，自從上次拍電影後已經努力keep fit，回復狀態準備復出。曾經有報道話阿Mo唔想我復出幕前，當然唔係事實，佢知我好鍾意拍嘢，佢好支持我，如果我要拍嘢，佢會負責湊小朋友，調番轉到佢拍嘢，就由我湊小朋友，我哋係partnership。」
注重仔女健康
係人都知陳豪係好老公，Aimee亦表示：「我同老公都好take care小朋友嘅所有嘢，尤其係飲食方面，我哋會親自買餸，選擇新鮮、有機嘅材料，然後親自去煮，咁樣會最清楚食物成份，我哋通常都會落香料，唔用調味料，保證小朋友食得最健康，無論是早餐、午餐定晚餐都會係咁，所以阿Mo一早起身都會煮早餐。」為了以最佳狀態復出，Aimee透露除了跟陳豪運動Keep fit外，平時飲食都會少油、少糖、少鹽:「如果拍拖食飯時，一個減緊肥，另一個唔係減肥，食飯會食得好辛苦，但依家我同阿Mo拍拖出街食飯更加開心，因為大家都要食得好健康，唔會引誘大家。」
(on.cc東網)
