【結束十年婚姻關係】父兼母職:一聽到眼淚即流晒

    又講番大仔兩年前離港讀書,送到去機場,堂堂大男人都忍唔住喊:「佢17歲去英國讀書,叫我唔使陪佢飛,自己一個人飛就可以,於是自己就送到佢去機場,佢一走咗,自己就梗係流眼淚啦!佢到咗又打電話返嚟,叫我唔使寄錢俾佢,話自己去餐廳打工,有400幾磅一個月(約$4,249港元),覺得好安慰,心諗點解成個人變晒嘅,以前好斤斤計較喎!」

    59歲嘅打星盧惠光,06年同前亞姐黎淑賢離婚,結束十年婚姻關係。兩人育有兩子,分別係19歲大仔Jacky同12歲細仔Jovan,一直以來都由盧惠光照顧。雖然,盧惠光離婚後甚少談感情事,對傳聞比佢細24年嘅女朋友亦不願多講,但一講到兩個寶貝仔就盡顯鐵漢柔情,冧到爆!

    噚晚ViuTV播出一集《晚吹-Daddy Kingdom》,盧惠光接受兩位主持細So同陳詠謙訪問,大談同兩子相處之道。佢自認係嚴父一名,有佢自己套教仔方法,好似去咗英國讀書嘅大仔,佢同囝囝講明,唔可以掂毒品,仲話如果收到電話、話「你個仔吸毒!」盧惠光講明,一定唔會去睇佢,亦唔會保釋佢。

    盧惠光又講番大仔兩年前離港讀書,送到去機場,堂堂大男人都忍唔住喊:「佢17歲去英國讀書,叫我唔使陪佢飛,自己一個人飛就可以,於是自己就送到佢去機場,佢一走咗,自己就梗係流眼淚啦!佢到咗又打電話返嚟,叫我唔使寄錢俾佢,話自己去餐廳打工,有400幾磅一個月(約$4,249港元),覺得好安慰,心諗點解成個人變晒嘅,以前好斤斤計較喎!」

    囝囝喺單親家庭長大,所以自己教好嚴,盧惠光話:「我成日同佢哋講,今日我唔教你,第日你大過一定會話老竇冇教你,所以我有自己一套教仔方法,總之你唔夠錢,可以問我攞,我會開心,但如成日計較,好似佢話我欠你20蚊,我會好嬲。」盧惠光又話:「囝囝去咗英國年半左右,打電話返嚟同我講『老竇你以前講嘅嘢係啱嘅!』自己聽到都流眼淚!」

    主持人問盧惠光有冇試過俾個仔激到好嬲?佢話大仔試過考試唔合格:「讀五、六年級啦,考試前問佢識唔識,佢話識晒,考完之後收電話要見家長,佢阿媽打嚟叫我去學校接番個仔,原來老師話佢好驚,唔敢返屋企,所以唔敢畀佢走,驚佢做儍事。」盧惠光憶述,當日去到學校,老師攬住佢個仔,然後阿仔同佢講:「爸爸,對唔住!」盧惠光自爆:「一聽到眼淚即流晒,然後個仔又喊,我攬住佢走,老師都呆咗!」

     

    節目中,盧惠光多次提到被兩個仔整喊經歷,其中一次係早年生日,兩兄弟夾手夾腳用木砌咗一個獎座畀佢,寫住「最佳老竇獎」,佢話一拆開啲眼淚就流出嚟。節目尾聲佢仲拍片同兩個仔吐心聲,主要係叫兩個仔要努力讀書,因為唔想佢哋步自己後塵,26個字母都唔識,所以一定要努力讀書,真係感性又感人!

    (蘋果日報)

    SHARE