【TVB最佳女朋友2號】素顏上陣 驚喜攬住錫錫!

呢對無綫情侶一向恩愛到爆,早前男方長駐內地拍劇集《包青天再起風雲》,兩個半月冇得見面,真係掛死對方!呢日,男友終於回歸喇,女友興奮到突襲接機送驚喜畀對方添!只見佢素顏上陣嘅一身街坊裝但就眼鼻通紅,原來佢開心到喊呀!佢仲親自整咗「Welcome Home」嘅字牌,畫上男友嘅Q版人像勁有誠意,怪唔之得Darren表現驚喜,仲忍唔住錫錫同攬實佢添,So Sweet!

李旻芳親手整咗張Banner迎接男友黃耀英回歸,好有誠意呀!

事後男友黃耀英(Darren)接受傳媒訪問時,表示事前得悉女友李旻芳(Lucy)會嚟接機,但一直扮唔知情:「雖然我估到Lucy會嚟接我,但見到佢嗰刻非常感動。從來未試過有人咁樣嚟迎接我,為我做咁多嘢,所以我好多謝佢,佢真係一個好完美嘅女友嚟!」Darren仲話喺內地拍劇期間,Keep住同女友每日視像通話,又會拍搞笑片氹佢開心,相當識做!

呢個畫面真係好Sweet呀!

兩個一見面就錫錫!

笑言事前得悉女友會嚟接機,但扮唔知情!

Lucy受訪時亦透露:「其實接機當日我要趕住開工,但都抽時間去機場,希望畀個surprise佢。事前我仲呃佢話要開工嚟唔到,不過當然係呃唔到啦,然後我見到佢一出嚟就忍唔住喊,因為真係太耐冇見面。但當時其他藝員同事喺附近望住我喊,有啲尷尬。(Darren有冇感動到喊?)佢本身見到我都想喊,但因為太多人而忍住。

李旻芳ig

 

 

(on.cc)