錢嘉樂同湯盈盈結婚6年，先後誕下兩女，大女錢凱晴（Alyssa）已經5歲，細女錢凱琪（Kassidy）亦快將滿3歲。一直有傳盈盈樂樂好想追多個仔，早前TVB社交網專頁上載一段盈盈同Kassidy做手作嘅短片，標題竟然寫住「恭喜湯盈盈再度懷孕！」最後搞清楚，原來係一場誤會。
湯盈盈 (資料圖片)
盈盈樂樂人前人後都咁恩愛，但前日竟然有讀者爆料指嘉樂當街呼老婆！讀者李小姐透過傳媒表示母親節下午三點幾，見到盈盈樂樂帶住兩個女行經賽西湖公園外，李小姐話喺對面馬路都清楚聽到佢哋講嘢好大聲，表現有啲忟憎，李小姐話﹕「最初聽到盈盈話『拖住個女，小心佢走出馬路』，跟住嘉樂就好嬲咁話『咁你交畀我喇，唔好咁多嘢講』，跟住就拖住大女行前，與盈盈同細路隔咗一段好遠距離。」
嘉樂(右)一手拖住大女行先，與盈盈(左)有一段距離。(讀者李小姐提供)
盈盈擔心囡囡自己走出馬路。(讀者李小姐提供)
問到係咪鬧交？盈盈前日回覆傳媒時就話﹕「係咪啲女做緊危險動作，佢緊張咋？」之後盈盈仲笑晒口話﹕「嘉樂話佢平時唔緊張架，唔知係咪你哋睇住啦。」
嘉樂唔使開工就會陪住屋企人，係公認顧家好男人。(ig圖片)
母親節當日，盈盈湊女前仲要出席《愛回家》宣傳，透露晚上會同老公嘉樂、奶奶及好友鍾麗淇一家吃飯慶祝，盈盈話﹕「早兩日已經訂好花畀媽媽同奶奶，仲同兩個囡一齊包禮物送畀工人姐姐，始終對方都係人哋媽媽，放下自己嘅小朋友去照顧自己個女。」咁體貼嘅老婆，嘉樂要錫老婆多啲喇！
母親節當日，盈盈出席《愛回家》宣傳，透露會同嘉樂及奶奶一齊慶祝，好孝順。
母親節約埋鍾麗淇一家食飯。(ig圖片)
(APPLE DAILY)
