安志杰同模特兒Jessica C前年3月生下愛情結晶Tessa，上年兩個人先去夏威夷補辦婚禮，囡囡今年已經2歲啦！去年底JC宣佈懷有第二胎，預產期係下月中，呢胎佢哋打算喺香港生，唔返美國生喇！
安志杰接受《蘋果》電話訪問，問佢呢胎係仔定係女，佢話：「Tessa很快就會有一個弟弟，我們非常非常開心，迎接我們的兒子來臨，希望大家可以祝福我們！謝謝！」迎接小生命，安志杰兩公婆仲影咗輯火辣性感相，就快生得嘅JC個肚好大，但五官同手腳都冇水腫。
問JC生完個女，又來個仔，剛好湊成個好字，咁仲會唔會再生多一個？佢話：「順其自然，等上天安排！」安志杰話佢已經停工幾個月，主要為咗照顧老婆，因為佢想一直陪到老婆生埋先復工，呢個廿四孝老公真係夠體貼。
JC最近都有做產檢，醫生話個BB好健康，叫佢哋放心，而囡囡Tessa知道就快有個弟弟好鬼開心，仲叫媽咪教佢將來點樣幫手湊細佬。
(蘋果日報)
