於14年公開男友後，不時網上貼相放閃，佢哋次次都孖咇去五星級大酒店食好西，14年情人節仲喺4粒鐘內連環放閃5次，一於要大家閃盲大家，要人人羡慕佢哋。又跟男友學做時裝生意，雙方又見埋家長，以為呢一pair打風都打唔甩。。。
陳冠希舊愛、o靚模謝芷蕙（Cammi）近年營商賣時裝，佢玩低調，連社交網都少po。不過炎炎夏日，Cammi BB噚日就喺微信朋友圈貼咗一輯水着相，好有當年寫真feel，佢又影前又影後，又影側面，實行360度任睇唔嬲。Cammi BB真係好鍾意玩P圖，着住三點式嘅佢又喪改圖變臉，將自己變「大眼妹」。
Cammi BB出道時報稱三圍係32B、24.5、34，佢發育都定咗，呢幾年變化唔大，《蘋果》噚日打畀Cammi BB，佢身處泰國度假，因為本周五就係佢23歲生日，唔怪得之出埠慶生。問到呢啲靚相係咪內地富二代男友B先生同佢影？點知Cammi BB話：「其實分開咗一段時間，今次我同一班朋友去。」
佢再話其實分開咗都半年，兩人再見亦是朋友，至於分手原因，Cammi BB話：「性格不合，大家和平分開。」即係Cammi BB去年底已甩拖，回復單身。Cammi BB於14年公開有內地富二代男友B先生後，不時網上貼相放閃，佢哋次次都孖咇去五星級大酒店食好西，14年情人節仲喺4粒鐘內連環放閃5次，一於要大家閃盲大家，要人人羡慕佢哋。Cammi BB封盤後，又跟男友學做時裝生意，長期住廣州，雙方又見埋家長，以為呢一pair打風都打唔甩，Cammi BB都等入門做少奶奶。
點知有時人算不如天算，Cammi BB臨門撻Q，佢同B先生結束四年情，女方o依家可以再開盤求偶。單身嘅Cammi BB決意事業上重新出發，佢話：「休息咗半年，四圍去玩，都嘥咗好多時間，上周簽咗國內一間公司，諗住喺國內發展。」
(蘋果日報)
