「老公叫我著平底鞋，不過真係揾唔到鞋襯，其實我都係嚟到先換咋。」張新悅笑指平時著得高踭鞋多都冇所謂嘅。預產期分別為6月尾同7月頭，一個佗仔、一個佗女！問到會唔會搞baby shower慶祝？張新悅就表示會搞baby shower，不過係四個女一齊搞。。。
張新悅同蔣怡兩個靚孕媽，今日喺尖沙嘴為西班牙童裝品牌nanos嘅限定店開幕擔任嘉賓，蔣怡仲貪靚著住高踭鞋現身。佢哋互相幫對方嘅腹中BB揀衫，笑言平時都會瘋狂為囡囡們買衫，仲話好想將啲BB衫變大，可以畀自己著。
蔣怡老公都有現身，期間不停為太太影相，蔣怡笑話：「老公叫我著平底鞋，不過真係揾唔到鞋襯，其實我都係嚟到先換咋。」張新悅笑指平時著得高踭鞋多都冇所謂嘅。
預產期分別為6月尾同7月頭嘅蔣怡同張新悅，問到會唔會搞baby shower慶祝？蔣怡就話唔會搞派對，不過生之前會同朋友出街食飯：「因為有妊娠糖尿，好多嘢唔食得，但我真係好鍾意食嘢。冇得食搞到我有少少抑鬱，所以啲朋友約我生之前一星期去食嘢，佢哋話就生唔怕啦，諗住食啲海鮮同飲幾滴酒，哈。」
張新悅就表示會搞baby shower，不過係四個女一齊搞：「一人搞一個好攰，一次過夾個時間，搞個楊家派對啦。」提到佢話封肚，張新悅坦言同老公傾過唔會做結紮手術：「我諗冇男人會好開心話結紮，佢諗起都驚，驚過見到『小強』，唯有同老公接觸少啲。」
笑言佢哋有四個女應該好少時間可以「接觸」？張新悅話：「都要維繫夫妻感情嘅，不過好尷尬呀，講到我流晒汗。」
(蘋果日報)
