【邊個接到阿嬌花球呢? 】Joey最後驚喜現身:錯過會覺得好遺憾

阿Sa喺台上首先走去阿嬌面前抱實佢,幾乎整段對阿嬌嘅講話……都係喊住嚟講:「自從阿嬌同我講……求咗婚啦,嗰一下係完全激動到……真係由十七年前開始我哋兩個……中間咁多年,大家一齊有過好多唔同嘅ups and downs,但係無論點樣都係一齊去度過。」

「去到今日,見到佢終於搵到一個好錫佢嘅人,呢幾日個心情係好唔識形容,好戥佢高興,同埋……真係好得意呀個感覺,大家一齊大,啊!佢而家要嫁人啦!我真係衷心祝福佢哋,要永遠幸福快樂⋯⋯日日都咁開心。就算嫁咗去台灣都要成日番嚟睇我哋。」

最後阿Sa更「警告」新郎賴弘國要好好保護佢嘅阿嬌:「你要對她好好的,不然我們不會放過你,哈哈。」

午宴期間,其中一位賓客突然彈奏場內嘅鋼琴,賴弘國上台唱出陶喆首《愛很簡單》,原來佢早已同呢位賓客夾埋俾驚喜阿嬌,事前阿嬌毫不知情,既驚喜又感動,眼眨淚光。

阿嬌好姊妹之一嘅容祖兒(Joey)之前差啲因美國簽証過期出席唔到,好在最終都排除阻難,Joey喺台上講:「上天保佑我今日可以企喺呢度見證阿嬌呢個咁大嘅日子,如果我攞唔到簽証、嚟唔到呢個地方,我諗好多年後我都會覺得好遺憾,我諗大家都知道我哋嘅關係好密切,(國語)非常的密切,非常的開心能夠見到她找到一個那麼愛她的人,我覺得每一人都值得在世上找到另外一個全心全意愛她的人,我非常非常的替你高興!」

最後到Yumiko講:「看着她慢慢長大,今天真的很感動。她在我心中是一個天使,很善良、心裹最純真的,你(賴弘國)好好的待她、好好的對她,如果不好我們龍虎豹蛇都不會放過你,小心點。」

賴弘國向阿嬌三位好姊妹阿Sa、Joey及Yumiko鞠躬,全場氣氛感人。此外,阿嬌拋花球時,叫咗所有單身嘅賓客出嚟接花球,第一次佢扮拋,第二次準備再拋嗰陣,阿嬌決定直接將花球交俾阿Sa手上,搞到阿Sa嚟唔切俾反應,只係一路傻笑。

阿Sa喺婚禮上為阿嬌又笑又喊,佢之後仲喺社交網發表感言:「想對你說的話太多太多…腦海裏浮現的畫面 這18年的 一幕一幕的 開心的 興奮的 緊張的 難過的…實在太多 寫了又刪 刪了又寫無數次 怎麼寫也描述不到心裏的感覺…」

阿Sa又表示:「大概是因為我們兩個人一起經歷 一起面對過的一切 旁人根本不能體會  也不用一一說明 就如我們平常說的笑話 其他人都總會無法理解 但是只有你懂我 我懂你 只有你知道我有多替你高興 我有多希望你永遠可以幸福快樂就夠了 雖然你再不是蔡太 要變成賴太了 但你永遠永遠都是我的小嬌嬌 無論角色怎麼變 你在我心中永遠不變 #一定要幸福💕 #loveyouforever❤」

(蘋果日報)