藝人佘詩曼今日43歲生日，人緣甚廣嘅獲得唔少好友同佢慶祝。「七魔女」好姊妹姚樂怡、周家蔚、湯盈盈、梁靖琪、鍾麗淇、文頌嫻就為壽星女搞咗個生日派對，一班靚女首先去咗食飯，仲安排咗壽包畀壽星女，真係好有意頭！
跟住佢哋等再轉場去咗卡啦OK，現場仲用咗好多氣球做布置，搞到成個場都係波，阿佘就好開心到高舉住成束氣球影相，笑到見牙唔見牙，童真返晒嚟！
一班好友仲送咗個兩層高，有熊仔同兔仔肖像嘅生日蛋糕畀阿佘，梁靖琪仲忍唔住吻賀壽星女，好有愛呀。
有無發覺多咗個呢？原來係康華呀！仲要喺中間，莫非係新成員之一？
康華喺微博晒相留言：「寶貝佘詩曼，生日快樂🎂🎊🎂🎁🎊！永遠幸福快樂健康跟隨你⋯如意郎君等待你⋯攞獎攞到你手軟⋯⋯心想事成只，永遠愛你」
（on.cc）
