【被TVB裁走後不幸患上漸凍人症】含淚多謝劉德華薛凱琪

常被派演小人物、鹹濕佬、店小二,甚至壞人。97年金融風暴,一個大浪,這個小人物就給無綫裁走。當年他40歲。

40歲才「被轉工」,由頭做起,吳博君轉行做過麵包師傅、紙紥舖、寫字樓清潔……由於不是做主角的命,銷聲匿跡娛樂圈多年後,沒有人會想起他。

廣告

人生如戲,台上台下都是小人物的吳博君,61歲,還未拿到兩蚊乘車優惠,卻命途多舛。今年3月16日,他忽然四肢無力,癱瘓在床,嚇得太太慌打999報警,急送入院,結果證實患了罕有的運動神經細胞疾病(MND)——俗稱「漸凍人」。西醫說:「冇藥醫。」吳博君跌落絕望深淵,見着手腳肌肉不停流失,瘦到皮包骨,太太停工照顧,兩人經濟陷困境。大小便都要在床,四肢動彈不得,頭腦卻是清醒到不得了。

廣告

吳博君曾經想過,不如死了更好!

幸而,天無絕人之路,在太太悉心照顧、親友打氣,還有患者的努力下,吳博君現在竟然奇蹟地可以再站起來,靠腳架走路。沒想到,拿起筷子自己進食,感覺原來是這樣美好。

雖然不是貧賤夫妻,但吳博君患病後跟太太都沒再工作,手停口停,問到經濟能力有否問題?博君坦言:「有,自己做唔到嘢,後來太太辭埋份工,真係完全冇收入,我太太諗起演藝人協會,打電話將情況講畀演藝人協會聽,後來協會聯絡咗麥包(麥長青),演藝人協會應承幫我哋少少。佢哋去醫院探我,我當年訓練班同學,冇聯絡嘅都湧晒出嚟探我,好似魯振順、湯鎮業、劉少君……真係走嚟醫院探我,廿三年冇見過!」

今年3月,吳博君忽然四肢無力,由太太報警送院。
演藝人協會聽到吳博君患病,聯絡咗麥包。(受訪者提供圖片)
虞天偉、艾威(受訪者提供圖片)
魯振順、湯鎮業、劉少君(受訪者提供圖片)

得人恩果千年記,博君眼紅紅、聲震震說:「喺呢度我特別多謝薛凱琪。我唔識佢,佢私人捐咗少少錢畀我,雖然唔多,但都係一番心意,我唔明點解有人咁好,原來有人真係好好㗎,人間真係有情,以前都唔係好覺,依家好覺。藝進會好多同學知道,有捐錢畀我,藝進會邊個捐助我幾多,有張清單,睇到劉德華都有捐,大家都好有心,好多謝佢哋,人情債唔知點還,只能講真係多謝佢哋。」

薛凱琪的圖片搜尋結果

劉博君特別多謝薛凱琪私人捐錢,一份心意對佢有好大支持。(資料圖片)

曾在無綫拍過多部劇集的博君,與華仔合作很多,他笑說:「佢好百厭,諗番好多回憶,大家好好同事,最記得佢拍《獵鷹》,佢做差人我做賊,佢拉咗我,喺沙田大坑渠打一大輪,成身污糟邋遢,大家一齊返去沖涼,諗起幾過癮,佢冇架子,只係百厭啲。」

吳博君稱依家有希望,可以落街慢慢行吓。

除了演藝人協會和藝進同學會捐錢外,原來博君的前任老闆,對他亦有情有義:「患病前最後嗰份工好輕鬆,因為我年紀有番咁上下,喺一間公司做清潔雜務,有少少收入又唔辛苦,做得幾開心,公司對我非常之好,我已經冇做、入咗安老院,老闆應承每個月津貼我五千蚊費用,為期兩年,我都嚇咗一跳。」他哽咽說:「世間上竟然有咁好嘅人,我真係估唔到,我依家返咗屋企,唔需要佢幫,但我好多謝佢。原來好多人對我好好,同學全部湧晒出嚟鼓勵我:『畀啲心機努力,唔好放棄!』真係好開心,我由一個好絕望,變番充滿希望嘅人。」

 

 

 

(apple daily)