【許晉亨樂易玲同兩個仔都到場】細心扶大肚老婆:當埋李美慧係女

    到場觀禮嘉賓有甄詠珊、陳志健、李民橋夫婦、楊卓娜、許晉亨、鄭世豪、張彥博、陳爽,楊明、林利、蕭若元、陳展鵬、樂易玲同兩個仔、梁婉靜同老公、李綺雯,陳君宜一家三口等。

    陳爽受訪時話送咗禮金:「以為喺草地行禮,一對新人決定喺室內進行,可以涼住冷氣觀禮。」佢又透露婚禮過程輕鬆:「佢哋氣氛好輕鬆,令大家都輕鬆,仲聽到曾文豪叫ViVi「乖啲喇」,見到ViVi都感動,佢又多謝自己家人。」陳爽話識咗ViVI十年,當時喺TVB8合作,讚對方好勤力,又識打功夫,鍾意向高難度動作挑戰。

    31歲落選港姐李美慧嫁56歲富商曾文豪,一對新人今日在淺水灣舉行婚禮。朝早曾文豪俾咗大叠開門利是接新娘,之後轉到淺水灣舉行註冊。

    李美慧媽咪將女兒交到女婿手上,着住銀色吊帶裙嘅外母都好後生,索爆程度不遜姊妹團,佢訓示女婿要好好痛錫佢囡囡,新郎哥衝口而出:「總之當埋佢係女。」其實新娘子李美慧真係同曾文豪同前妻生嘅細女曾昭亮同係31歲,曾文豪除咗答應外母錫老婆,佢大爆金句:「最緊要整到我長命。」

    一對新人同李美慧媽咪(右)影合照。

    儀式結束後,一對新人從長樓梯下來,新郎細心扶住大肚老婆落樓梯,落到接近面地時,新娘笑住同老公講:「不如我蹺番你啦!」跟住就挽住老公隻手一齊影相。新娘着住束身腰間透視婚紗,無花誇裝飾,戴住條珍珠頸鍊,手上戴上鑽戒,簡約好睇。

    李美慧開心話:「我哋儀式同普通新人一樣。」曾文豪好合拍咁接住話:「換衫,化妝,嚟到招呼朋友、簽紙。之前講話落雨,好彩今日天氣好好。」曾文豪又話自己嘅仔女有到場觀禮,因為儀式簡約,無安排啲孫做花仔:「兩個女外孫,同一個男外孫都有到齊。」

    新娘子講到出嫁心情:「噚日諗住令到自己攰啲,所以出海游水游咗一個晏畫,點知夜晚返到去都係成晚瞓唔着,直到o依家都未瞓過。」心情係咪好興奮?佢笑話:「唔知興奮定緊張,驚啲嘢安排得唔好,好多謝老公。不過頭先台上致辭時,腦中一片空白,唔知自己想講咩。」老公即刻話:「我都有好多嘢想講,怕overrun冇講。」

    問到李美慧幾時正式停工養胎?佢就話8月前會完成所有工作。老公有冇叫結咗婚之後唔好做嘢?曾文豪搶住答:「唔會,佢鍾意就得。」李美慧聽到個樣勁冧,挨實老公然後話:「我老公好好。」

     

    (綜合報道)

    SHARE