黃長興早年喺天后開設嘅餐廳，最近又變身做越南菜，昨日試業，搵嚟圈中好友陳山聰、李施嬅等到場，黃長興透露除咗有幾個拍檔之外，仲有黃百鳴個仔黃子桓有份投資，黃子桓話：「今次投資6位數字，長興話唔蝕錢。」
林夏薇昨日負傷到場，佢話：「6月1日出席完慶功之後，我自己揸車返屋企途中，係一個小路出大路嘅位置，突然有一架車攔腰撞埋嚟，我當時頭痛頸痛，後來個女司機落車，覺得自己冇錯，但我架車嘅副駕駛座至車尾嗰邊全部爛晒，即時有報警，第二朝又去醫院檢查，但今朝早左邊手冇力同麻痹，陣間我要去醫院覆診。」
另外，早前有報道指陳山聰同女友Apple傳婚訊，佢昨日否認：「之前雜誌出咗，女友問我『乜我哋結婚咩？』，我話『乜我哋唔係結婚咩？』，其實我只係同記者提過同有諗過，我哥哥知道我大使，有好多投資嘅項目都叫我參與，想我儲錢，所以唔會今年結婚，計劃下先啦，有好消息我一定話畀大家知。」
(蘋果日報)
