【曾渡過感情危機、患罕見疾病】杜汶澤多謝田蕊妮

杜汶澤同田蕊妮拍拖6年,二人喺2005年拉埋天窗,當時出動華仔色誘眾姊妹。阿澤曾經講過:「太太16歲識我,如果我哋好彩行到尾,佢一生只得16年冇我喺隔籬,我過澳門探班,佢問我點解對佢咁好?我話以前對你好差咩?佢話:『簡直離X晒譜!』」阿澤搖頭自爆:「以前自己好離譜,試過太太返到屋企,見到我同個女仔一齊,衣衫不整。」

親眼目睹老公出軌,難得阿田仍冷靜地為老公着想,阿澤內疚說:「佢話我點對佢唔重要,最重要點對自己,萬一我車住條女俾人影到,有冇諗過自己玩完?佢永遠唔介意我點對佢,只介意我點對自己,過咗咁多年,我嘗試學過唔同生活,到頭來發現最好係老婆,呢幾年老婆唔check我,我問佢點解咁信我?老婆話:『我唔驚,我使乜睇住你,黎智英會睇住你!』哈哈,好多男藝人老婆,其實暗地裏喜歡傳媒。」


佢哋結婚近14年,二人多年嚟遇過感情危機、阿澤曾患罕見疾病「米勒費雪症候群(Miller Fisher Syndrome)」,必須停工,田蕊妮當時喺寧波拍戲,自責未能喺阿澤身邊陪伴,阿澤仲安慰番佢轉頭,令田蕊妮佩服阿澤遇到逆境,仍能安然面對,讚阿澤係佢「心目中的巨人」。

田蕊妮返港後,每日喺醫院照顧老公,阿澤曾指佢同阿田係「威士忌愛情」越嗒越有味,杜汶澤講過愛的宣言「以前誤會以為成功就會得到女人,但原來得到一個好的女人就等如成功」。患難見真情,感情更勝從前。

阿澤亦喺上年結婚週年紀念日時發表愛的宣言:「今天是我們的結婚週年紀念……曾經有人跟我說,婚姻,就是將錯就錯。感謝妳這十三年來的將就,祝妳健康、快樂!」

真係好感動!

(蘋果日報)