【真正的愛】王浩信﹕所有經歷也像昨天發生

34歲嘅王浩信去年首奪視帝,事業起飛,但婚姻卻亮起紅燈。


有傳王浩信與陳自瑤(YoYo)難敵七年之癢,YoYo對王浩信失去信任,而王浩信曾公開承諾買樓畀老婆,但最後竟然喺YoYo不知情下買咗價值3,000萬豪宅送畀媽咪,徹底當她透明,令她心碎決定分居。


有指YoYo近年有返教會,經常與教友傾訴心事,而6歲女兒王靖喬今年9月升讀小學,將由爺爺嫲嫲負責照顧。王浩信回覆傳媒時僅以「唔回應,謝謝」,未有否認。


不過,王浩信嘅心情似乎未有太大影響,噚日喺ig上載一張新、舊對比嘅相片,見佢同一名相識多年嘅男友人「玩閹」,男友人扮到好痛楚,十分搞笑。王浩信以英文留言﹕「真正的朋友,真正的愛。左邊的相片是現在的我和朋友的模樣,而右邊那張相片是17年前,我們在西雅圖拍攝。時光飛逝,但我們依然友誼永固,望着他,覺得所有經歷也像昨天發生,只充滿着愛和歡樂,超越國家和言語的界限,恭喜你走進人生新的一頁,為你感到高興」。


王浩信未有透露身在何地,但背景唔似係香港,似乎係去咗外地準備出席友人婚禮,妻女未有同行。

(蘋果日報)