曾為「電波少女」成員的前TVB藝人梁雪湄，後來轉型從商，開美容院，投資食肆，近年仲做埋Blogger。佢出席有份投資的茶餐廳開幕，推出以她名命的甜品，她笑言：「因為啲人成日話我凍齡吖嘛，咪出個奶凍，食咗就長生不老，皮膚好似BB咁又白又滑。（食完會唔會好似你上圍咁勁？）你哋日日嚟試吓。」
雪湄稱不少人問她凍齡秘訣，她坦言是天生：「多謝媽咪生得我咁後生，我媽咪個樣都生得好後生，佢已經七十幾歲，但睇落比真實年齡年輕十幾年，生完三個連一條肚紋都冇，佢依家彎腰仲可以掂到腳指公。除咗遺傳之外。另一半係因為我依家經常周圍飛去旅行，人開心啲，外地空氣又好啲，而我經常潛水曬太陽，同埋戒咗蒲，以前蒲完飲酒，第二日個人魂不附體。」
至於會否再拍劇？雪湄表示只要時間配合到，劇本又過癮，不介意客串，她說：「依家個人大咗，有啲錢，餐廳生意又上咗軌道，我又鍾意去旅行，我淨係去旅行、寫旅遊blog同潛水都冇乜時間。」
(on.cc東網)
