【直接Send短訊問佢】鄧達智日日擔心Clement出軌

時裝設計師鄧達智(William)與外科醫生陳梓欣(Clement)攜手突破框框,兩人將於英國時間本月15日在倫敦註冊結婚,正式結為合法同性伴侶。兩人相識數月便決定訂婚,去年九月在港擺喜酒,今年六月到英國註冊結婚,婚事在21個月內極速完成。

一向予人硬漢子形象,現年60歲的William,比44歲的Clement年長十多歲,惟婚期逼近亦不禁緊張起來。Clement爆料指William曾傳短訊問他是否有第三者,William說:「我諗係一個月前,我覺得係咪要問清楚,我本身個人好易變,就驚人哋會變,肯定係有婚前恐懼症㗎啦,我諗好多人都有,每日瞓上床就好多嘢諗,問咗佢好幾次,每個星期都問,都好密,呢個係溝通嚟嘅。」Clement笑言內心都好甜,因有人着緊自己,惟有不停替William做心理輔導。

結婚前夕,他們揀好的黑白配禮服曝光,Clement操肌苦練四舊腹肌,手瓜起晒𦟌,差點逼爆西裝!鄧達智透露會先行出發到英國打點,簽字儀式於15日下午2時在Chelsea Old Town Hall舉行,之後到Pig’s Ear Pub開派對,將邀請40多人出席,預計註冊、派對連旅行使費要花20萬港元。因工作關係,Clement於15日早上才會抵達英國,他曾擔心萬一航班延誤就可能趕不及簽字,幸好他們仍有plan B,就是待挪威、冰島和意大利蜜月旅行後,經英國時再補簽,William笑言若plan A不成派對亦會照開。

 

 

(on.cc)