【大阪6.1級地震】小儀金剛身在日本:頭暈暈…

日本大阪今早(18日)發生黎克特制5.9級地震(已上升至6.1級),關西多個地區都感受到強烈搖晃。藝人傅嘉莉、小儀、金剛同衞志豪咁啱就齊齊去咗鳥取同姬路拍新節目,傅嘉莉都有喺社交網同大家報平安,佢上傳咗影住電視機嘅畫面,仲留言指:「好得意,個電視畫面係喺度震緊㗎!」

傅嘉莉上傳電視嘅畫面指佢哋都feel到地震。

 

隨後她接受訪問:「一切安好,沒事,有睡夢中被警報嘈醒,感受輕微震動,頭暈暈,兩、三秒後就停下來。看到新聞報導(道)有些地方出現地陷,火災,不過我哋離大阪有一段距離,冇咁大震盪。家人都有即刻打來問我有冇事,我都有報平安。」

衞志豪、金剛、小儀、傅嘉莉齊齊去咗日本做嘢!

而小儀、金剛亦有回覆大派定心丸,小儀說:「冇事呀!我哋依家拍緊嘢,我哋都唔喺大阪,喺姬路,離大阪都有一段距離。總之,我哋今朝每個人都感覺到地震,但係就唔係咁嚴重,我哋都有睇到,知道大阪好嚴重,我哋呢邊好安全,冇事!」金剛更搞笑指:「嗰啲地震嚇唔到我哋㗎!我哋無事,只係畀啲警報訊號嘈醒!」

不過佢哋就唔喺大阪,而係去咗附近嘅姬路。

 

另外,佢哋一行四人昨晚仲去咗shopping,不過唔知係咪買得太開心,搞到大家shopping完因為太夜,返酒店時發現冇晒車,就算call車都要最少等20分鐘,真係慘慘豬呀!

香港入境事務處表示,獲悉事件後,已即時透過外交部駐港特派員公署、中國駐大阪總領事館及香港旅遊業議會了解情況。入境處已向查詢當地交通情況的市民提供相關資訊。入境處會繼續與公署、總領館及旅議會保持聯繫,密切留意事態發展。在外香港居民如需協助,可致電入境處「協助在外香港居民小組」的24小時求助熱線,電話: (852)1868。

 

(on.cc)