藝人張寶兒出席「big big channel KIDS x Think big 夏日大想」活動，她表示經理人正安排她上《美女廚房》，但未定日期，她坦言：「好驚，因為對住啲爐同鑊，要時間去適應。（想事前知道對手？）當然想，我都有睇《美女廚房》，有睇JW（王灝兒）劏魚，我都驚驚哋，未必劏到，我之前去韓國拍《學是學非》要畀啲魚仔食腳皮，我叫得仲大聲過坐過山車，我未試過劏生嘢，平時都係買處理好嘅食材。（要練習定？）我都要踏出呢步。」
另外，提到男友袁偉豪早前喪父，問到男友心情如何？她說：「成件事都過咗去，大家都知道要放低，但好難話有乜大改變，要時間去適應，佢嘅工作好密集，依家投入工作。（你點安慰佢？）陪佢多啲，好難有安慰說話，始終要靠佢自己去釋懷。佢哋全家陪到爸爸走最後一程，都算係好圓滿，冇乜遺憾。」
(on.cc)
