【傳秘撻魔術師】37歲陸詩韻︰我又唔係要學人哋

    05年港姐亞軍陸詩韻(Sharon),離開大台9年,最近在劇集《宮心計2深宮計》飾演宋王妃,首次演奸角的她,再次被人留意。

    近年Sharon的工作,可說是一半幕前一半幕後,最近重投拍劇工作的她,感覺仍有好多新鮮感,她說︰「初初唔係好慣,好耐冇試過捱夜。雖然好辛苦,但我又覺得好親切,始終我喺呢度出身。」今次Sharon演奸角宋王妃,得到不少網民稱讚,她本人亦感意外︰「原來有人鍾意我拍劇,係好大嘅強心針。」稍後她接到不少大陸劇組找她拍古裝,如《我的前世情人》演歌伎。

    談到離開大台9年,Sharon回想這段日子,百感交雜。「呢幾年做生意,真係經歷咗好多,遇過錢銀轇轕,再加上感情經歷,打擊真係好大。曾經有段時間,行出街就覺得人哋講自己,我試過去睇心理醫生,但醫生幫唔到我。」為何連醫生都幫不到她?她笑謂︰「醫生畀啲安眠藥我,叫我瞓好啲,收我幾千蚊,其實真係幫我唔到。」Sharon形容自己這幾年的經歷,尤如過山車。


    說到此,Sharon不無感歎︰「呢個世界好細,好事壞事都會有人知。依家慢慢學識要同人傾,有前輩教我,唔好怕人講,唔好理人咁多,呢啲經歷確係令我成長。」人言可畏,關於Sharon的話題,不離感情生活。曾經歷幾段感情,卻未能開花結果,甚至「上埋身」受連累。「帶眼識人」四字,Sharon說︰「係呀,我真係冇乜眼光,只可以話自己唔好彩。但係我好阿Q精神,細個遇到呢啲經歷,跌過都仲有時間起番身,好過我50歲先遇到。」


    最近為好姊妹李美慧做陪嫁姊妹,湊巧新郎哥曾文豪,正是她的舊愛曾文能的哥哥,與舊愛婚禮上相遇,令她再次成為焦點。

    對於與舊愛同場,她坦言並不尷尬,她說︰「大家分咗手十年,仲係好友關係,間中都有約食飯gathering。」難得大家仍保持聯絡,而且Sharon與前男友的家人相處不俗。眼見好姊妹李美慧嫁得好,之前接受訪問提及嫁個有錢人的重點,包括不可工於心計,不要化濃妝,及有時要扮蠢蠢地等,問到Sharon對於這些提點有何看法,她不用思索的說︰「每個人都有自己嘅意見,我自己冇特別去過濾,因為我覺得要嫁一個人,最重要係嫁一個自己心愛嘅人。」

    仍是單身的Sharon,自言自己人漸長大,不會如一般少女般夢想嫁過有錢人,她說︰「緣份到就到,係你嘅就係你。我係個實事求事嘅人。當然美慧有佢嘅心得同睇法,我又唔係要學人哋。」談到做人要踏實點,即使將來與男朋友,或老公,她覺得不可以「老奉」,Sharon說︰「我不嬲都係咁,以前同男朋友出外食飯,佢畀十次我總要畀番兩、三次。我覺得唔可以次次人哋請,唔可以吓吓奉旨。」她認為男士雖然要有風度,不過她覺得,即使將來當了人家的女朋友或太太,她的思維同樣堅持女性要獨立和自主。

    近年盛傳她與舞台劇演員兼魔術師、38歲的高正安撻着,提起對方,Sharon總是說︰「大家都係朋友,佢係一個好好嘅男仔,了解中。」兩人2014年因合作舞台劇《千奇百解》而認識,問她了解4年了?她笑謂︰「我小心嘛!要了解清楚對方。」天生男仔性格的Sharon,坦言男友要忍到她的脾氣,「我唔係小鳥依人嗰種,對方要接受到我內在同外在係好唔同。」她覺得只要另一伴,對家人好又孝順,又愛護小動物,一定心地不壞。

    (蘋果日報)

    SHARE