【感情生活空白】康華為患病父母推7位數字酬勞

藝人康華最近在無綫熱播劇《宮心計2深宮計》中與「公公」韋家雄有一段「神交」感情,超乎想像,而現實中她更賠上感情生活。入行24年的她,起初演過不少情婦角色,形象不太討好,當年着實有不少追求者,礙於劇集形象的影響,先後有兩個男友都發展不成,原因是被男方家人看不起,認為她抱着「嫁有錢人」心態,令她自覺不受尊重,一怒下放棄這種有色眼鏡之感情,2007年轉移到內地發展,拍過不少劇集,賺「人仔」亦令她成為圈中小富婆,高峰期時康華曾擁三層逾千萬的荃灣物業。

推兩內地劇少賺7位數

可是父母年邁加上患有心臟病,更曾因康華未有在旁照顧幾乎出事,康華說:「當時我人在大陸,只係電話了解父母病情唔夠,有幾次我趕返嚟先救得番父母,佢哋有心臟病,唔係工人可以照顧得嚟,所以我索性推咗兩套劇,返港照顧佢哋!」

內地發展大有「錢途」,康華卻毅然推兩劇達7位數字酬勞,並花費近百萬積蓄給父母做心臟和眼部手術,康華絕無半句埋怨,並說:「錢係冇咗,但我有多咗時間睇我父母,覺得好幸福,以前有錢咪帶父母睇私家醫生,依家冇咯,咪轉睇公立,原來公立醫院嘅醫療設備都好完善。其實最大分別係探病時間較嚴謹,醫生都好體諒我,有時會通容我,又會耐心講解畀我聽!」

趕去街市買餸煲湯侍孝

日前現康華忙完工作,入夜後趕去觀塘街市,買藥材、排骨及蔬果等,給父母煲湯進補,之後見她拿着大袋、細袋到醫院,相信是探望仍留醫的老父,認真孝順。

現年46歲的康華,雖未至於人老錢冇,但至今單身十年,她卻不表心急,並說:「好多人都以為女明星多人追,其實我真係冇人追,但唔緊要啦,『真命天子』未出現,我就利用呢段時間好好珍惜同父母相處,都係一件好幸福嘅事!」

(on.cc東網)