【同肥姐一樣都係…】欣宜:好似個天俾多次機會我

廣告

鄭欣宜日前接受鄭紹康主持嘅奇妙電視《天下第一friend 2》節目,就講到多年入行點滴,提到自己11年出第一張專輯反應比預期好,不過就未有為佢帶來平坦嘅演藝路,因為兩年後出到第三張專輯就反應唔好,令到佢想退出:「當時覺得自己半紅不黑、高不成低不就,直至第一次見蕭定一,好似個天俾多次機會我去試。」


之後,欣宜就同黃偉文(Wyman)食飯,Wyman斷言說要令佢變成女神:「我作好第一句歌詞了,就是『不要低頭,光環會掉下來』,你找人作曲吧!」最後就搵到藍奕邦作曲。


提到自己一出道就做纖體公司代言人,要積極減肥,欣宜話:「我迫得自己好緊,精神好唔健康,更會為了維持體重及體態而傷害自己。」

廣告


曾拒絕照鏡,佢話點睇都覺得頭好大,身長腳短。欣宜就發現點瘦,都唔會達外間標準身形,同埋身邊親友同佢講無論自己肥或瘦,做邊行都要愛自己。


欣宜更重提因健康問題,喺17歲因膽石做咗割膽手術,已經唔能夠吃太油膩食物,加上年紀漸大,已學懂節制,同唔強求標準身形,認為當下活得健康快樂最重要。


其實,欣宜身形當然有遺傳佢阿媽肥姐沈殿霞,加上細細個就已食嘢冇節制,所以17歲就要割膽,而肥姐自己本人喺02年都做過割膽石,當時入威爾斯做手術,拎咗36粒膽石出嚟。

(蘋果日報)

廣告