「佢哋攞住兩個大篋諗住畀驚喜我，點知一開門媽咪見到我居住環境咁樣……」
等足9年，噚晚終於圓夢踏上紅館舞台，舉行一連兩場演唱會。
全晚最重要一個環節，就係全家上台支持Gin Lee，佢哋以深藍色「家庭裝」現身，爸爸打鼓，姐夫彈bass，媽媽同姐姐就唱歌，Gin話屋企人對佢很重要：「我係全家最細，佢哋對我影響好大，係我嘅啟蒙老師，影響我聽歌，所以我聽歌嘅variety好闊！」唱完《給我一個吻》，再與家姐合唱《我也不想這樣》，Gin Lee更力sell家姐，叫公司簽佢。
馬來西亞歌手李幸倪(Gin Lee) (右一)
台上亦有播放Gin Lee成長片段，Gin憶起父母首次嚟香港探望，佢話﹕「佢哋攞住兩個大篋諗住畀驚喜我，點知一開門媽咪見到我居住環境咁樣，就擰轉面偷喊，因為間屋一係企到個人，或只能放兩個篋，原來個女喺出面咁辛苦。」佢話爸爸當時打圓場話﹕「幾得意，打掃方便，兩秒搞掂。」但媽媽之後每次打畀佢，都會話如果好辛苦就不如唔好唱歌。
Gin Lee直認多來港確實捱咗唔少苦：「2010年嚟香港踢館，2011年就 嚟香港住，當時我喺香港無依無靠，試過有晚凌晨2點我肚痛到郁唔到，唔知可以打畀邊個，又唔敢叫白車，每逢過節見到一家人食飯，我嗰刻都會……」佢仲話試過窮到冇錢交租，唔知點樣繼續行，但最後仍然堅持，並勸勉其他人面對解決唔到嘅問題時，要相信「明天會更好」，叫大家一齊加油！
葉蒨文同Eric Kwok都有撐場睇騷。
（apple daily）
