現年44歲、有「溝女王」之稱的李思捷桃花旺盛，緋聞多多，先後與「春卷」王寶葆和陳雅倫等傳出緋聞，但統統沒有結果，不過四十多嵗的他終於定性，據悉他早前於朋友聚會上，結識了一名廿歲出頭的「嫩口劉佩玥」，女方長長頭髮，外表斯文賢淑，相識不久已打得火熱，縱使年齡相差約廿年，但面對年輕女友，思捷卻打算將其私有化，有指兩人早前已火速訂婚，女友更不時現身男友何文田寓所，展開同居關係增進了解。
日前思捷便帶女友做「孝順新抱」往探望未來奶奶，當日他與女友雙雙離開愛巢，沿途邊行邊談情，期間又手拖手「蜜蜜斟」，步往附近李媽媽的寓所。未幾思捷駕車接載母親及女友直駛尖沙咀一間酒店，思捷協助坐輪椅的母親落車時，女友亦表現體貼立即上前幫手，不過，當她發現記者時，卻極為怕醜，火速先行步入酒店內。一行人歎茶歎足個多小時才埋單走人，不過離開時「嫩口劉佩玥」卻走秘道，獨留思捷驅車送母親返家。
思捷及後接受訪問，提及和女友與媽媽飲茶時，他說：「女仔係要識嘅，我都40幾歲，唔識女仔好大鑊。（聽聞你哋訂咗婚？）嘩！我都想呀！咁你等我派帖啦！我都想快啲乖乖哋定落嚟，識啲又好又適合自己嘅，我都大個佬啦！大家要了解深入啲先，性格方面都好重要，要互相適合先得。（阿媽覺得佢點？）哈哈！最緊要個仔鍾意、喜歡啫！阿媽都話啱就快啲喇！唔好玩嚟玩去！身邊好多朋友都催我結婚。」他還透露母親兩年前脊椎發炎要坐輪椅，每星期接受物理治療，問到會否快些送個新抱給母親陪覆診，他即笑說：「咁我家姐又好好喎！佢成日都陪阿媽去覆診嘅。」
李媽媽最開心啦，就快飲新抱茶。
(on.cc)
