【甩頭髮仲差啲死…】李施嬅:啲人問我係咪冇做

    藝人李施嬅現身無綫劇集《天命》於商場舉行嘅首播,佢話有兩年幾冇出劇,希望大家支持:「我好似消失咗咁,啲人問我係咪冇做,以為我嫁人、生仔。(撞正世界盃播出,會唔會覺得運滯?)係天命。大家可以去myTV SUPER睇番。我拍呢套劇搞到甩頭髮,有辛酸時間,大家要支持我。」除咗甩頭髮,施嬅話其中一場戲差啲畀對手譚俊彥捏死:「佢捏到我青筋都出晒,佢仲話我啲青筋都識做戲,係因為佢太肉緊,佢真係好投入。」

    施嬅話計劃同「胡說八道會」嘅好姊妹姚子羚同胡蓓蔚一齊去旅行,其他成員胡杏兒就忙湊B,胡定欣就要拍劇去唔到:「想去泰國或者菲律賓展開一個洗滌心靈之旅,之前一直忙拍劇,又要飛嚟飛去,太辛苦,我哋去到嗰邊食全素又會冥想之類。」不過,之後佢又補充話此行其實最重要係影泳衣照,仲爆胡蓓蔚買咗新泳衣,好想着嚟影相。

    (on.cc東網)

    SHARE