【感情似乎有轉機】恭喜哂洗米嫂!

太陽娛樂文化老闆周焯華(洗米華)今年冇得再做廣東省政協委員,不過佢老婆陳慧玲(洗米嫂)今年就當選成都市政協委員,日前佢就同一班港澳嘅成都政協代表去咗成都參加一個名為「成都港澳台海外代表人士培訓班」,接近有成50人參加,洗米嫂着晒軍裝,今日出發去咗中國工農紅軍長征翻越嘅第二座大雪山夢筆山嘅軍營接受災期5日嘅訓練。

今日洗米嫂就同一眾委員登山,聽日就要去災區,剛才洗米嫂就喺ig貼咗佢着晒紅軍裝嘅相,睇佢着住軍服嘅相都幾有英姿,同平時嘅佢個樣係好唔同。

講到佢同老公洗米華嘅感情,相信就有啲好轉喇,事關早兩日佢經營嘅花店開張,佢老公同鄺美雲都有嚟剪綵,洗米嫂個細女都有嚟,洗米華見到個細女都好開心,爭住抱囡囡,現場所睇,佢兩公婆有講有笑,似乎夫妻感情有轉機。

其實呢間花店係同「綠‧廚房」聯乘一齊做,聽聞係洗米華打本俾老婆開嘅,除咗賣花,主力係做網上訂購,地舖就連埋出售健康果汁同健康輕食,如沙律同蛋糕,令客人置身花叢中有High tea感覺,飲完茶可以買啲花或小盆栽返屋企擺。

(蘋果日報)